صحيح تبديل عقد الكهرباء كان سابقا ضحك على اللحى بس حاليا الوضع اختلف مية بالمية لانو شركات الكهربا المحلية عم ترفع الأسعار بدل ما تنزلها لانو الكهربا بشكل عام رخصت بعد ارتفاع السنة الماضية .
ازا كان سعر الكيلو واط عندك اكتر من 35 سنت ف طبعا لازم تبدل عقدك و رح نشرح عن الطريقة فورا.
كيف بعرف ايمتا بينتهي عقدي؟
حسب الشركة و حسب ايمتا اخدت البيت ولكن انت المفروض تبدل عقدك على جميع الأحوال والشركة الجديدة هي بتتكفل بالكونديكونغ وموعد بداية العقد.
بتفوت على ال Check24 Strom من هون بياخدك مباشرة على صفحة مقارنة اسعار الكهرباء و بتحط مدينك و استهلاكك السنوي و بتدوس مقارنة و رح يعرضلك فورا الاسعار و الشركات .
الإختيار الصح :
من الفلتر تبع ال Check24 بتشيل خيار حساب البونوس و خليك على السعر الحقيقي للكهربا .
مثلا في شركة مكتوب جنبها وسطيا 50 يورو بالشهر و في بونوس 240 يورو ، فالسعر الحقيقي للكهرباء بهالحالة مرتفع ولكن مع حساب البونوس بيصير وسطيا 50 يورو بينما انت رح تدفع بالواقع 70 يورو شهريا و عطيني عمر بينما يبعتولك البونوس .
هي عدا شروط و بنود البونوس . لذلك اخي الكريم ابتعد عنهن و فلتر البحث بحيث تكون الحسبة بدون بونوس حتى لو كانت مع البونوس ارخص بكم يورو و النصيحة كانت بجمل.
النقطة التانية: في تقييمات لكل شركة حسب رضا الزبايين انت ازا شفت تقييم الشركة كتير زبالة بلاها حتى لو كانت اوفر ب شوي .
مدة ثبات السعر Preisfixierung: كتير احيان بتشوف سعر خارق حارق , انتبه أخي بيكون السعر ثابت ل شهر واحد و بعد هالشهر الخازوق.
بالنهاية لا تحملها كتير اخي نقي شركة بلا بونوس و سعر رخيص و نظرة ع تقييم و قول الله دوس التالي.
بتعبي بياناتك و رقم العداد و الكوندن نومر تبعك عند الشركة القديمة و خالصين ، هني بيفصلوك و بيبعتولك ايميلات ايمتا رح موعد الكونديكونغ صار و ايمتا رح يبلش عقدك فعليا معهم و بيرجعو بيبعتولك ايميلات بالعقد و تفاصيلو .
و قبل بداية العقد بيجيك بوست او ايميل مشان تعطيهن العداد لحتى يتحسابو هني و الشركة القديمة و الموضوع غالبا اونلاين بتفوت ع رابط و في خانات رقم عدادك و العداد الحالي بتعبيهن و انتهى الموضوع استمتع بالتوفير.